O sábado 5 de maio abrimos as portas do Alto da Praza ás 10:00 da mañá para dar comezo a unha nova xornada cargada de actividades. Comezamos cunha charla-obradoiro de xaponés a cargo de Eliezer Rajoy, onde aprendemos algúns kanjis e a escribir o noso nome. Foi un gustazo escoitar ao profe e moitxs quedamos con ganas de seguir aprendendo.
Ás 11:00 deu comezo o obradoiro de cómic coa debuxante Begoña García-Alén, que foi nomeada como autora revelación no 2017 no Salón do Cómic de Barcelona grazas ao seu último traballo, titulado "Nuevas estructuras" (Editorial Apa Apa).
Ao mesmo tempo, cara ás 12:00, tiña lugar a entrega do premios do Concurso de Cómic organizado polo Concello de Moaña. A calidade dos traballos presentados deixounos a todxs coa boa aberta. A alcaldesa de Moaña, Leticia Santos, foi a encargada de repartir os premios e aproveitou para sacar fotos coas nosas cosplayers visitantes e algúns dos nosos mangas.
Nada máis rematar a entrega de premios, deu comezo unha das actividades máis esperadas desta Comicon, a charla de Julio Lorenzo, dobrador de Son Goku ao galego e tamén director de dobraxe. Contounos unha chea de anécdotas da profesión e aceptou peticións do público para demostrar o seu dominio do personaxe protagonista de "Dragon Ball".
Ao longo de toda a mañá estiveron ateigados de xente os espazos dedicados aos xogos, tanto os da Asociación de xogos de mesa de Cangas (Tempus Ludit), como o de Mazinger.
